أدق تلفون
أدق تلفون
أدق تلفون
اقول يامحمد ارفع لي
يجيني الصوت كسير وحزين
(محمد مات)
وقعت صاقعة فوق الحي
فقدت احساسي بالعالم
دوار وطشاش
جاني شعور انا الميت
وهو الحي
جل الله تعالى الحي
ونزلت دمعة من عيني
أتلفت يمين وشمال ما فيش حي
جمال الدنيا عندي ظلام
بعد الضي
فقدك نار
يا قشاش دموع الحي
انت الكهربا النارت ربوع الحي
وانت الموية للعطشان
ور اجي الري
وكنت علاجنا للجرحي
التقول احي
تفارق كيف
يا زينة ربوع الحي
انا كان قلت أكرم زول
وكرمو يفوق حاتم طي
مو قول قالوا
شوف عيني
وانا كان قلت أطول زول
واجمل زول
اخو الاخوان
قراب وبعاد
كريم اخلاق
واسع رأي سمح الزي
وانا كان قلت كافل أيتام
وبدي الزاد ناضج وني
فعالك اصلو ما بتحصي
كان غلطان ردوا علي
انا شفت السحاب راحل
وفيهو اخوي
برق العينة راحل فيهو
(أحمد شرفي) يشهد لي
صبح تحت التراب راقد
عند الواحد المحي المميت الحي
اقبلو يا كريم الجود
وعلى مراتبو
عندك انت
غافر السي
شرق النيل اول اغطس 2021
علي الطيب النوبي
موضوع: رثاء الفقيد المرحوم محمد بابكر موسي ابوكليوة 