حال الدنيا بتشيل حايز العلوم و الجاهل
ما بتعرف تميز بين صغير أو كاهل
القدر ان وقع ما بجيك تب متماهل
الموت جد مصيبه والصبر مو ساهل
..
ان تم العمر ماف زول بزيد فوق يومو
راضين بالقضا ماف زول بيقدر إلومو
كم ماتولنا ناسا" اتجرعوها سمومو
لكن موت مثالك شقا" بصدع قومو
..
يا الأبو و المعلم و المربي الفاضل
من ما قمتا في سوح العلوم بتناضل
يا الناحن عليك أمات وضيبا" سادل
كان في الموت بدال الناس فيك بتبادل
..
بتبكيك المدارس والعقول النايره
بتبكيك الطوابير و العلم والساريه
يبكيك الطباشير والمسائل الغائره
تبكيك الخلوق جت بالطيور الطايره
..
تبيكيك الحروف بي أبجديها وعجمي
تبكيك العلامات و الحساب الفئوي
تبكيك الخطابات و الحديث الفموي
وتبكيك البالغه و الكلام النحوي
..
فقدك كم أليم ما داب خاله و عمه
فقدك كم جلل ما داب قرى متلمه
فرقك ي حسن ما أظن تاني انتمه
فقد ي الرصين بتحسبو كل الأمه
..
يا بحر العلوم أيا المحيط الزاخر
معروف بالبراعه والفي التفاني مواتر
مشهود ليك نزاهه وفي الصراحه مشاتر
كم أشعلت نور في الظلمه فجا دياجر
..
مثالك ما كتير حت في القرون الفاتو
ما ظنيت لهيب فرقك تخف لسعاتو
مطمورة علم منها الجميع يقتاتو
ربيت الجميع الأباتو في أو ماتو
..
هيلكم من ما قمتو والله موهو جديد
وراثة خير مسلسله من حفيد لي حفيد
يشهدبو الجميع تاريخ تلييد و أكييد
لأولى المدارس أبوك بداء التشييد
..
ما بيوفي القلم ولا التباكي بفيد
ما بيجزي الكلام فيك انت بالتحديد
ما بتشبهلي زولا" يا الطرازو فريد
صعب العلم من فاهك بيبقى سريد
..
نسألك الله بي حروف كلمة التوحيد
وبحق من تعلم في دروسو نشيد
يا لطيف يارحيم عن نار جهنم يحيد
في أعلى الجنان يعيش هنئ و رغيد
..
...
لا نقول إلا ما يرضي الله ، إنا لله وإنا إليه راجعون
#أحمدعثمان قاسم عتار