موضوع: حكاياتى مع المجانين(1) الأحد ديسمبر 18, 2016 11:57 pm
اولا اعاذنا الله واياكم من الجن وبالذات الجن الكلكى مع انو ما عارفو شنو كلكى لكن شكلو اخطر انواع الجن والنوع دة بيتعب الشيوخ تعب شديد يعنى بخرات ومرات جلد بالسوط وقيد بالجنزير وزي ما بقولو شقى الحال يقع فى القيد لكن برضو ما بطلع بالساهل ومرات يقرا مع الشيخ القرآن يعنى جن حافظ كمان وانا شاهدت مجانين زي النوع دة كتير لانو عندنا مسيد الخليفة الفاضل بالطندب وهنالك فى نظام لكل مجنون يعنى زى الجنو كلكى دة بكون زول ضرب وخطف وبخش دايما شمال دة نظامو اولا بربطوهو بالقيد بالجنزير فى غرفة بها عود عمودى فى نص الغرفة لتثبيت مرق الغرفة اسمو الدارجى اللمينة وبربطو ليهو كرعيهو على اللمينة وتبدا مرحلة العلاج وبعدما يبدا يتحسن ويخلى الضرب والكوراك والمقابضة ويكون لعلمكم اي مجنون بتكلم كتير بتعالج سريع لانو بحتو قرض يعنى بمرق الجواهو عكس البكتما جواهو اها بعدها بفكوهو من قيد اللمينة وبعملو ليهو قيد فى كرعيهو مربوط بحبل طويل بكون ماسك الحبل بى يدو عشان ممكن يتحرك بيهو عادى اها زولنا الداير احكى ليكم عنو وصل المرحلة دى لكن طلع حريف يعنى رافع القيد فوق الركبة ومغطيهو بى جلابيتو وماشى عادى يعنى ما بتعرفو الا يكشكش القيد كما حدث معى الوقت كان اذان العشاء وانا قاعد فى مصطبة جنب بقالة قريبة للمسيد واخونا دة جايى من هناك من خارج المسيد وبصوت كله تهديد يلا قفلو البقالة دى ما سامعين الاذان دة؟؟) قبل ما يصلنا بتاع البقالة دخل يبايع ليهو زبون وانا كنت لابس طاقية زولنا بدون مقدمة خطف الطاقية وكرر كلام التهديد مرة تانية انا فى البداية افتكرتو بهظر قلت ليهو يا زول جيب الطاقية دى لكنه قال لى ما بديك ليها الا تلعب معاى كاراتيه انا عندى حزام فى الكاراتيه وبدا يعمل حركات بهلوانية هنا طوالى سمعت ليك كشكشة القيد عرفت ليك زولنا فاطى صفحة عشان كدة قررت اتعامل معاهو بنفس لهجتو وبصوت قوى عشان يعرف انا ما خايف منو وقلت ليهو يا زول جيب الطاقية ما تعمل لى فيها مجنون انا اجن منك لكنه حلف الا العب معاهو كاراتيه البفوز على التانى يشيل الطاقية فى اللحظة دى جاء ولد صغير خطف منو الطاقية وادانى ليها زولنا فات الجامع بعد شوية اتوضينا ومشيت الصلاة ولسوء الحظ القى ليك زولى زاتو اخر زول فى الصف يعنى لازم اصلى جنبو ماف طريقة بعد السلام طوالى داير اقوم مسكنى من جلابيتى وقعدنى فى الواطة وقال لى: ما عايز تدينى الطاقية؟؟ طبعا هو منطط عيونو نظام ارهاب وكدة..قلت ليهو: الطاقية دى شاديها..وفجأة كدة جرانى من جلابيتى بحركة مفاجئة ومازال منطط عيونو وقالى: خلاص ادينى الجلابية.. قلت ليهو: الجلابية زاتا شاديها..وبحركة يأس واستفذاذ قالى : انت والله روحك زاتا بتكون شاديها..وبعدما قنع خلاص من الطاقية والجلابية بدا يشرح لى سبب جنو بت خالتو كان بحبها شديد واخد منها شاكوش وانا اطمئن فيهو اقوليهو دى زاتا ما بتستاهل يجنو عشانا والله بكرة تعرس الاحسن منها وفى نفس الوقت انا بحاول افك جلابيتى منو وهو مازال مكنكش فى فيها ومصر يحكى لى تاريخ حياتو لحدما المصلين كلهم طلعو ومازال مصر على الحكى ومرات كمان بالانجليزى لحدما غفير الجامع قفل الشبابيك والابواب وطلب مننا نكمل كلامنا برة لكن انا ما صدقت انفكيت منو ووعدتو انو اجيهو فى غرفتو عشان يكمل لى تاريخ حياتو. بالمناسبة الزول دة بقى كويس ورجع كمل الجامعة واشتغل موظف كمان.. زكريا عبدالرازق-مسيد الخليفة الفاضل الطندب
موضوع: حكاياتى مع المجانين(1) 
يلا قفلو البقالة دى ما سامعين الاذان دة؟؟) قبل ما يصلنا بتاع البقالة دخل يبايع ليهو زبون وانا كنت لابس طاقية زولنا بدون مقدمة خطف الطاقية وكرر كلام التهديد مرة تانية انا فى البداية افتكرتو بهظر قلت ليهو يا زول جيب الطاقية دى لكنه قال لى ما بديك ليها الا تلعب معاى كاراتيه انا عندى حزام فى الكاراتيه وبدا يعمل حركات بهلوانية هنا طوالى سمعت ليك كشكشة القيد عرفت ليك زولنا فاطى صفحة عشان كدة قررت اتعامل معاهو بنفس لهجتو وبصوت قوى عشان يعرف انا ما خايف منو وقلت ليهو يا زول جيب الطاقية ما تعمل لى فيها مجنون انا اجن منك لكنه حلف الا العب معاهو كاراتيه البفوز على التانى يشيل الطاقية فى اللحظة دى جاء ولد صغير خطف منو الطاقية وادانى ليها زولنا فات الجامع بعد شوية اتوضينا ومشيت الصلاة ولسوء الحظ القى ليك زولى زاتو اخر زول فى الصف يعنى لازم اصلى جنبو ماف طريقة بعد السلام طوالى داير اقوم مسكنى من جلابيتى وقعدنى فى الواطة وقال لى: ما عايز تدينى الطاقية؟؟ طبعا هو منطط عيونو نظام ارهاب وكدة..قلت ليهو: الطاقية دى شاديها..وفجأة كدة جرانى من جلابيتى بحركة مفاجئة ومازال منطط عيونو وقالى: خلاص ادينى الجلابية.. قلت ليهو: الجلابية زاتا شاديها..وبحركة يأس واستفذاذ قالى : انت والله روحك زاتا بتكون شاديها..وبعدما قنع خلاص من الطاقية والجلابية بدا يشرح لى سبب جنو بت خالتو كان بحبها شديد واخد منها شاكوش وانا اطمئن فيهو اقوليهو دى زاتا ما بتستاهل يجنو عشانا والله بكرة تعرس الاحسن منها وفى نفس الوقت انا بحاول افك جلابيتى منو وهو مازال مكنكش فى فيها ومصر يحكى لى تاريخ حياتو لحدما المصلين كلهم طلعو ومازال مصر على الحكى ومرات كمان بالانجليزى لحدما غفير الجامع قفل الشبابيك والابواب وطلب مننا نكمل كلامنا برة لكن انا ما صدقت انفكيت منو ووعدتو انو اجيهو فى غرفتو عشان يكمل لى تاريخ حياتو.