بعد ان تعزر سفرى الى هجليج يوم الاربعاء الموافق 7/12/2016 نسبة لزيادة عدد المسافرين ووقوفى فى اواخر الصف وتانى ماف طريقة الا يوم السبت لانه لا توجد هيليكوبتر من هجليج الى حقل نيم الذى اعمل به الا يوم السبت وهذا يعنى تلاتة يوم ملح ونحن شعب بحب الملح والزمن بدل الضائع يعنى تلقى الواحد قاعد عاطل وقرفان وكاره السودان ويتمنى يتخارج منو فى اقرب فرصة ولما يلقى الفرصة ويكمل الاجراءات وتحديد السفر يتمنى ياخرو ليهو السفر كم يوم عشان يستمتع بهذه الايام وتتغير صورة السودان فى ذهنو ويشوفو اجمل بلد فى العالم عشان كدة انا شايف التلاتة يوم دى اجمل من ايام كل الاجازة وشايف الخرطوم كانها باريس وبرج الفاتح كانه برج ايفل وشارع المطار كانه شارع مونتانى ومول عفراء كانه المركز التجاري مارشيه سان جيرمان ومتحف السودان القومى كانه متحف اللوفر وميدان الخليفة كانه ميدان الكونكورد ولذلك شلت شنطتى وانا امنى نفسي بايم جميلة فى اجمل مدينة وانا طالع من الصالة حاسى كانه اول يوم فى الاجازة واول حاجة فكرت فيها اغشى اقرب ست شاي اشرب شاى بزلابية حارة اطلع بيها البرد الخش جوة عضمى وخاصة انا طلعت من فندق ريجنسي الساعة 6 صباحا فى عز البرد والزيفة وبعدها رجعت البيت رميت الشنطة وطلعت طوالى يعنى لازم استغل التلاتة يوم احسن استغلال مر يوم الاربعاء بسلام والخميس كان ماشى تمام لحد الرابعة عصرا عندما رن تلفونى عاينت للشاشة لقيت المتصل رقم مألوف لدى كلما دق الجرس زادت دقات قلبى لانى كنت طالع مشوار مهم جدا اخيرا فتحت الخط.
-الو
-السلام عليكم
-عليكم السلام والرحمة
-زكريا كيف اخبارك؟
-الحمد لله تمام
-بكرة فى طيارة فاضية ماشة هجليج الساعة عشرة صباحا تكون فى المطار عشان تسافر فيها
-حاضر يا باشا وربنا يسهل( طيارة فاضية فى السقط دة ويوم الجمعة كمان؟؟ )
خلاص برنامج الجمعة طرشق وعديت باقى يوم الخميس وبكرة من الساعة 9 شلت شنطتى واتحركت على المطار خشيت صالة المغادرة لقيت البلد فاضية ما عدا الموظفين عاينو لي باندهاش ومستغربين فى الزول المسافر براهو دة واحد منهم يقول لى اركب مع الكابتن اتعلم السواقة وتانى يقول لى مفروض توثق الرحلة دى لانها ما حصلت قبل كدة واحد يسافر فى طيارة براهو ولا حتى رئيس الجمهورية وثالث يقول شكلك مهم شديد وانا حسيت نفسي كانى وزير النفط وودعونى لحد باب الخروج واتصلو بسواق البص عشان يوصلنى الطيارة ولما جاء سال: وين باقى الركاب؟؟ قالو ليهو: بس الزول دة وحدو المسافر فضحك وقاليهم: هسة جايبنى عشان زول واحد مفروض تجيبو ليهو عجلة يصل بيها الطيارة..لما وصلت الطيارة طبعا كان الاستقبال والاندهاش والضحك من الطاقم والامن وبعدما استلمت مقعدى وربطت حزام الامان قعد جنبى احد المضيفين يوضح لى اجراءات السلامة طبعا ماف داعى للمكرفون الداخلى: يوجد اربعة نوافذ للخروج الاضطرارى نافذتان فى الامام ونافذتان فى الوسط معلمة بعلامات حمراء مميزة وفى حالة انخفاض ضغط الاكسجين داخل الطائرة بتنزل كمامات من اعلى تلبسا لتعويض الاكسجين وحاتطير الطيارة على ارتفاع 30000 قدم ويستغرق زمن الرحلة ساعة واربعة دقائق ثم سألنى: حافظ دعاء السفر؟؟ قلت ليهو ايوة..قالى ضاحكا: خلاص اقراهو براك....ثم حلقت بنا نوفا وهى تخترق السحب وتسبح بنا فى الفضاء عاليا الى ان استقرت فوق 30000 قدم وطفت اشارة ربط الاحزمة وجابو لى الفطور المظبط بالصينية طبعا العبد لله فى آي بي كبير وبعد العصير قلت للمضيف داير اشوف كابينة القيادة قالى جدا يا باشا وبعدما استأذن لى من الكابتن قالى اتفضل قمت خشيت الكابينة وقعدت بين الكابتن والمساعد وبدو يشرحو لى طريقة السواقة وطريقة القيام والهبوط وكيف تحدد المطار الحاتهبط فيهو عن طريق الاحداثيات بعد شوية الكابتن والمساعد طلعو بعدما وضعو الطيارة ف الطيار الآلى قلت دى فرصتى اتعلم السواقة طوالى قعدت فى مقعد الكابتن وفجأة بدت الطيارة تهتز لانو فى مطبات وحاولت اسيطر عليها ومسكت المقود لكنها ميلت يمين عكست الاتجاه ميلت شمال سحبتو على نزلت لى تحت وسحبتو تانى لاعلى قامت لى فوق وبديت اجرب كل الطرق وهى شغالة مرة يمين ومرة شمال زي سواقة العربية فى الطين ومرة فوق ومرة تحت وبعد محاولات خليتا نازلة لى تحت عشان اقدر اشوف المطار مع انى بقيت ما عارفة ماشة فى ياتو اتجاه وفجأة ظهر المطار ومسكت المقود قوى عشان اقدر انزلا بامان وفعلا مشت نازلة اتجاه المدرج لكن انا ما عارف اخفض السرعة كيف عشان كدة نزلتها بسرعتا فى بداية المدرج وطوالى جريت الفرامل وفجأة اسمع ليك بممم لاصحو على صوت عجلات الطائرة تصطدم بمدرج مطار هجليج والقى ليك نفسى مربوط بحزام الامان فى مقعدى وماسك فى الطاولة الفى المقعد القدامى ولحظتها افتقدت صوت المضيفة وهى تقول: بحمد الله ورعايته هبطت بنا الطائرة بسلام فى مطار هجليج ودرجة الحرارة الآن 21 درجة مئوية نيابة عن شركة نوفا للطيران وكابتن مازن صلاح الدين نتمنى ان تكونو قد استمتعتو معنا بالرحلة آملين ان نلقاكم فى رحلة قادمة..وحقيقة انا استمتعت بالرحلة متعة لم احس بها من قبل شكرا شركة نوفا على هذه الفرصة الرائعة واملى ان الاقيكم فى رحلة زي دى قادمة لكن تانى غير الكرسى الجنب الكابتن ما بقعد.
زكريا عبدالرازق-شركة النيل الكبرى للبترول
موضوع: انا ونوفا فقط على ارتفاع 30000 قدم 